Skuvle, ööhpehtimmie

Tjïelten ööhpehtimmiereereme tjïelten gaajhkh skuvlehammoeh gïetede, aarhskuvleste geerveööhpehtæmman. Aaj frijjeskuvlh aarhskuvledaltesistie jåarhkeskuvledaltesasse gååvnesieh.

Aarhskuvle
Aarhskuvlesne nööremes maanah åadtjoeh pedagogeles barkojne meatan årrodh ööhpehtamme barkijigujmie. Aarhskuvle jïjtse learoesoejkesje åtna.

Maanah 1-5 jaepien båeries reaktam utnieh sijjie aarhskuvlesne jis eejhtegh berkieh jallh lohkehtieh. Jis eejhtegh barkoste frijje onnemaanam geehtieh dellie båarasåbpoe maana reaktam åtna aarhskuvlesne 15 tæjmoeh fïerhten våhkosne. Aaj reaktam åtna jis eejhtegh barkoem ohtsedieh.

Eejhtegh gïeh berkieh jallh lohkehtieh aarhskuvlesijjien åvteste maeksieh. Maaksoe ryöknesåvva eejhtegi tjåenghkies baalhkan våarome.

Gaajhkh maanah 3 jaepien jïh 5 jaepien gaskem reaktam utnieh åesehts pedagogeles darjoemasse 15 tæjmoeh våhkosne, sïejhme aarhskuvle, jïlhts eejhtegh berkieh jallh eah barkh. Sïejhme aarhskuvle faalehte skïereden 1.b. raejeste suehpeden 31.b. raajan.

Aarhskuvlh gellie sijjine. Akte aarhskuvle faala maanasåjhtoem dejtie gïeh jïjjh jïh hïeljh berkieh.

Mellanselesne, Giedåesne jïh Björnesne ræhpas aarhskuvlh gååvnesieh. Dohkoe maanah gïeh eah leah tjaalasovveme sïejhme aarhskuvlesne maehtieh båetedh åeline. Ræhpas aarhskuvle leah ræhpas njieljie biejjieh våhkosne jïh eah daarpesjh bïeljelidh jis sijhtieh båetedh. Dïhte lea namhtah ræhpas aarhskuvlese båetedh.

Sïjhth datne aarhskuvlesijjiem ohtsedidh maahtah dam darjodh e-dïenesjen tjïrrh tjïelten webbesijjesne (goere sveerjengïelesne). Maahtah aaj ringkedh tjïelten viekselem 0660-880 00 jïh viehkiem åadtjodh. Ohtsedh unnemes njieljie askh åvteli sijjiem daarpesjh.

Aarhskuvleklaasse
Jaepesne gåessie maana 6 jaepie illie tjïelte faalenassem aarhskuvleklaassen bïjre eejhtegidie seedtie. Aarhskuvleklaasse jïjtjevyljehke jïh galka våaromem vedtedh goske maana skuvlem aalka.

Maadthskuvle
Dah gïeh tjïeltesne tjaalasovveme åadtjoeh bööremem skuvleaalkose jaepesne gåessie maana 7 jaepie illie. Jis eah eejhtegh sjïere vaajtelassh utnieh dellie maana aalka skuvlesne mij lea lïhkemes dej årromesijjie.

Jis datne båatah tjïeltese maanine skuvleaalterisnie datne skuvleekspedisjovnem gaskesadth dajvesne gusnie årroeh. Jis ih daejrieh mij skuvledajve, tjïelten viekselem gaskesadth 0660-880 00 jïh datne viehkiem åadtjoeh.

Eejehtshïejme
Eejehtshïejme maanide 6-13 jaepieh, mah vååksjemem daarpesjieh skuvlen åvteli jallh mænngan. Barkoe skuvle learoesoejkesjen mietie. Eejehtshïejme skuvlen lïhke. Eejhtegh eejehtshïejmesijjien åvteste maeksieh.

Eejehtshïejmesijjiem ohtsedieh goeren tjïrrh tjïelten webbesijjesne (goere sveerjengïelesne). Maahtah aaj tjïelten viekselem ringkedh 0660-880 00 jïh viehkiem åadtjodh.

Kultuvreskuvle jïh teknihkeskuvle
Tjïelten kultuvreskuvle jïh teknihkeskuvle leah jïjtjevyljehke darjomh mejtie learohkh maehtieh ohtsedidh meatan årrodh skuvlen mænngan.

Sjïereskuvle
Learohkh mah dåarjoem daarpesjieh skuvlesne edtjieh voestes ieresne dam åadtjodh skuvlesne mij lea gåetien lïhkemes. Learohkh ålvas svihtjemeheaptojne maehtieh, goerehtimmien mænngan jïh eejhtegi vaajtelassi mænngan åadtjoeh sijjiem sjïereskuvlesne. Maahta medisijnen, psykologijen, pedagogihken jallh sosijaalen sjiekieh våaroemisnie mah vuarjasjieh bööremes tsiehkieh learoehkasse vedtieh evtiedæmman jïh lïerehtæmman.

Jåarhkeskuvle
Orrestaaren tjïelten jåarhkeskuvle lea Parkskolan jïh Nolaskolan. Gåabpatjahkh faelieh dovne teorijen jïh praktihken ööhpehtimmieh. Noerh gïeh gaarsjelieh jïh giej ulmieh elitedaltesasse nuepiem utnieh gaarsjelimmiejåarhkeskuvlese ohtsedidh mij nuepiem vadta gaarsjelidh jïh lohkedh.

Jollebe ööhpehtimmie
Orrestaare faala dovne barkoejolleskuvleööhpehtimmieh jïh universiteeteööhpehtimmieh jïh dotkemh Upmejen universiteete ektesne. Aaj nuepiem gååvnese jeatjah skuvli kuvsjh maajeööhpehtimmine lohkedh.

Universiteetesijjie Orrestaaren jarngesne, bussi jïh tåågi lïhke. Studeenth åadtjoeh årromesijjiem jïh dan åvteste leejjemem maeksieh.

Geerveööhpehtimmie jïh valideereme
Geerve almetjh mah eah maahtoem utnieh maadthskuvledaltesisnie jallh jåarhkeskuvledaltesisnie nuepiem utnieh dej lohkemh lissiehtidh. Datne gie Orrestaaresne tjaalasovveme åadtjoeh tjïelten geerveööhpehtæmman ohtsedidh tjaktjen seamma jaepie goh datne 20 jaepieh illh. Ööhpehtimmie namhtah maadthvåaromen daltesisnie. Jåarhkeskuvledaltesisnie datne tjoerh ööhpehtimmiematerijaalh jïh litteratuvrh åestedh.

Dïhte gie jeatja laanten ööhpehtimmieöörnegen tjïrrh jallh jeatjah vuekien maahtoem åådtjeme nuepiem åtna sov maahtoem valideradidh. Valideeremen mænngan almetje maahta vïhtesjimmiem åadtjodh sov maahtoen bïjre. Gaskesadth geerveööhpehtimmiem: 0660-889 00.

Sveerjengïele sis-juhtijidie (sfi)
Tjïelten geerveööhpehtimmie faala sveerjengïele sis-juhtijidie (sfi) almetjidie gïeh eah maadthmaahtoem sveerjengïelesne utnieh. Datne tjoerh unnemes 16 jaepien båeries, tjïeltesne tjaalasovveme jïh ellies persovnenummerem utnedh jis sïjhth meatan årrodh. Sveerjengïele sis-juhtijidie maahta jeatjah ööhpehtimmine, barkojne jallh praktihkine aktanidh. Ööhpehtimmie namhtah.

Bïevnesh sfi:en bïjre, gaskesadth geerveööhpehtimmien kuraatorem: 0660-889 88.

 

Sidan uppdaterades

2017-09-19

Sidansvarig: